November 2025

काठमाडौँ — बलिउड अभिनेता अजय देवगनको मुख्य भूमिका रहको फिल्म ‘दे दे प्यार दे २’ गत १४ नोभेम्बरमा रिलिज भयो । करिब १०० करोड कुल बजेटकाे यो फिल्मले कतिको व्यापार गर्यो होला ? निर्देशक अंशुल शर्माको निर्देशन रहेको यो फिल्म सात दिनदेखि प्रदर्शनमा छ । सातौँ दिन फिल्मले ३. ०५ करोड कमाइ गर्यो । जुन अघिल्लो दिनको तुलनामा निकै कम हो । फिल्मले पहिलो दिन ८.७५ करोड, दोस्रो दिन १२.२५ करोड, तेस्रो दिन १३.७५ करोड,चौथो दिन४.२५ करोड, पाँचौँ दिन ५.२५ करोड र छैटौँ दिन ३.५ करोड कमाएको थियो ।भारतीय बक्स अफिसमा फिल्मले अहिलेसम्म ५०.८ करोड कमाइसकेको छ। यो फिल्म २०१९ मा आएको ‘दे दे प्यार दे’ को सिक्वेल हो । पहिलो सिक्वेलमा अजय देवगन, रकुल प्रीत सिंह र तब्बू मुख्य भूमिकामा थिए ।

काठमाडौँ — ५ महिना अघि नै पोस्टर सार्वजनिक भएको फिल्म ‘बाटुलो जून’ को बल्ल छायांकन सुरु भएको छ । अनमोल केसी अभिनित यो फिल्मको निर्देशन भुवन केसीले गर्दैछन् । सनराइज पिक्चर्स प्रालीको ब्यानरमा निर्माण हुने फिल्मको आजै शुभसाइत गर्दै निर्माण पक्षले फिल्मको छायांकन थाल्यो ।यसअघि अनमोललाई लिएर ‘ड्रिम्स’ बनाएका भुवन १० वर्षपछि फेरि छोरालाई नै राखेर यो फिल्मको निर्देशनमा होमिएका हुन् । फिल्ममा अभिनेता अनमोलसँगै कलाकार प्रिन्सी खतिवडा र न्यान्सी खड्काको अभिनय रहनेछ । अन्य कलाकारमा प्रकाश घिमिरे, रेअर राई, दिपक केसी, श्वेता मिश्र, लक्ष्मी गिरी, शारदा गिरी, लक्ष्मीनाथ तिमिल्सिना, शिशिर शिवाकोटी, अर्पणा घतानी, विविका पौडेल र कमल देवकोटा छन् । ग्रामिण परिवेशमा बन्ने यो फिल्म प्रेमकथामा आधारित रहने बताइएको छ । ४५ दिनमा छायांकन सक्ने योजनासहित हिँडेको निर्माण टोलीले फिल्मलाई काठमाडौ, ढोरपाटन, काभ्रेपलाञ्चोक, चित्लाङ र पोखरामा खिच्नेछन् । सामिप्यराज तिमिल्सेना र सरिन पोखरेलको पटकथामा बन्ने फिल्मलाई राजेश श्रेष्ठले खिच्नेछन् । फिल्ममा रेनशा वान्तवा राईको कोरियोग्राफी रहनेछ ।

‘म लामो समयदेखि काठमाडौं क्षेत्र नं ३ मा बस्दै आएँ । यहाँको समुदायसँग घुलमिल छु । मेरो पहिलो रोजाइ काठमाडौं ३ नै हो ।’काठमाडौँ — ‘शाम्बाला’ निर्देशक मीन भामले ‘८४ को चुनाव लड्ने’ कुरा पहिल्यैदेखि भन्दै आएका थिए । ‘शाम्बाला’ प्रदर्शनमा आउने समयमा मिडियामा खुलेरै उनले आफू चुनाव लड्न तम्तयार भएको बताएका थिए । तर, जेन-जी आन्दोलनले देशको परिस्थिति फेरिएको छ । अन्तरिक सरकारले २१ फागुनमा चुनाव मिति घोषणा गरेपछि मीन पूर्ण रुपमा यतिबेला चुनावी तयारीमा होमिएका छन् । हुन त यसअघि उनी ८४ को चुनावसम्म एउटा फिल्म गरिसक्ने ध्याउन्नमा थिए । तर, अवस्था बद्लियो । अहिले त्यो फिल्मको काम त्यसै छाडेर उनी चुनावको तयारीमा लागेका छन् । उनलाई काठमाडौं क्षेत्र नं ३ बाट चुनाव उठ्ने रहर छ । ‘म लामो समयदेखि काठमाडौं क्षेत्र नं ३ मा बस्दै आएँ । यहाँको समुदायसँग घुलमिल छु । मेरो पहिलो रोजाइ काठमाडौं ३ नै हो,’ मीनले भने, ‘तर पार्टीको आफ्नो संयन्त्र छ । भोलि टिकट दिने समितिले मेरो अगुवाले पुर्ख्यौली घर मुगुमै पठाउनुभयो भने म जान तयार हुनुपर्छ । म चुनावको लागि एकदम तयार छु ।’

सिरहा र धनुषा जोड्ने कमला पुलको काम धीमा गतिमा, झापाको कन्काई पुलको प्रगति ५६ प्रतिशत मात्र, काम नभएपछि ठेक्का तोड्ने आयोजना कार्यालयको तयारी | काठमाडौँ — हुलाकी राजमार्गअन्तर्गत १४ वर्षअघि ठेक्का भएका दुई ठूला पक्की पुलको निर्माण अझै सकिएको छैन । झापाको कन्काई पुलको ठेक्का सम्झौता १४ वर्षअघि अर्थात् २९ जेठ २०६८ मा भएको थियो । यस पुलको प्रगति अहिलेसम्म ५६ प्रतिशत मात्र छ । पुलको ठेक्का पप्पु–महादेव खिम्ती जेभीले ३४ करोड ९ लाख रुपैयाँमा लिएका हुन् । महादेव खिम्ती नेपाल निर्माण व्यवसायी महासंघका अध्यक्ष रवि सिंहको कम्पनी हो । पहिला ७ सय २५ मिटर लामो यो पुलको काम सुरुमा पप्पु कन्स्ट्रक्सनले गरेको थियो । उक्त कम्पनीका मुख्य व्यक्ति हुन्, पूर्वसांसद हरिनारायण रौनियार । पुल र सडकको ठेक्का लिएर समयमै काम नसकेपछि यस कम्पनीलाई सार्वजनिक खरिद अनुगमन कार्यालयले कालोसूचीमा राखेको छ । उसले नयाँ ठेक्का लिन पाउँदैन । यही कम्पनीले जेभीमा लिएको अर्को ठेक्का हो, बलान–कमला सडकअन्तर्गत सिरहा–धनुषा जोड्ने कमला नदी पुल । यसको ठेक्का सम्झौता ३१ जेठ २०६८ मा भएको हो । सुरु सम्झौताअनुसार ३० मंसिर २०७१ मा काम सकिसक्नुपर्ने हो । ३० चैत २०८२ सम्म काम सक्ने गरी समयसीमा तोकिएको छ । उक्त समयभित्र काम नसकिए ठेक्का तोडिने सडक विभागले जनाएको छ । अहिलेसम्म निर्माण प्रगति भने ८३ प्रतिशत मात्र छ । यसको ठेक्का रकम २४ करोड ९० लाख रुपैयाँ छ । अहिलेसम्म २० करोड ४२ लाख रुपैयाँ भुक्तानी भइसकेको छ । ठेक्का डिजाइन एन्ड बिल्डअन्तर्गत भएकाले ठेक्का लिने कम्पनीले नै डिजाइन गरेर यसको निर्माण गर्नुपर्छ । ठेक्का लिने कम्पनी पप्पु–लुम्बिनी जेभी हो । पुलको निर्माण सकिएर हस्तान्तरण गर्ने बेला १७ असार २०७८ मा आएको बाढीले पुलको दुई जग भासिएको थियो । त्यस्तै ४ वटा स्ल्याबमा क्षति भएको सडक विभागले जनाएको छ । सडक विभागका महानिर्देशक, निर्माण व्यवसायी र विज्ञसँगको उपस्थितिमा छलफल भई पुल पुनर्निर्माणका लागि डिजाइन र ड्रइङ स्वीकृत गराई निर्माणको काम अघि बढाइएको हो । त्यसो त निर्माण अघि बढाउन हुलाकी निर्देशनालयले व्यवसायीलाई पटक–पटक पत्राचार र ताकेता गरेको थियो । १२ वटा स्पान रहेको पुलको लम्बाइ ४ सय ९६.२ मिटर छ ।

अर्थ मन्त्रालयको स्वामित्वमा रहेका २० (बीस) वटा चारपाङ्ग्रे सवारी साधनहरुको नेपाल बिमाकम्पनीमार्फत पूर्ण बीमा गरिएको हो । काठमाडौँ — अर्थ मन्त्रालयले २० वटा चारपांग्रे सवारी साधनको बिमा गरेको छ । असोज ५ मा बसेको मन्त्रिपरिषद्को बैठकले ‘सरकारी सवारी साधन पूर्ण निर्जीवन बिमा गर्ने’ निर्णय गरेको थियो । त्यही निर्णयका आधारमा अर्थ मन्त्रालयको स्वामित्वमा रहेका २० (बीस) वटा चारपाङ्ग्रे सवारी साधनहरुको नेपाल बिमाकम्पनीमार्फत पूर्ण बीमा गरेको हो । यसबाट आगामी दिनमा सरकारी सवारी साधनको आगलागी, दुर्घटना जस्ता कारणबाट क्षति हुन गएमा बिमा दाबीको रकमबाट सवारी साधन खरिद गर्न सकिने हुँदा सरकारी कोषबाट हुने खर्चमा कमी आउने, प्राथमिकताका क्षेत्रमा स्रोत व्यवस्थापन सहज हुने र सार्वजनिक वित्त व्यवस्थापन प्रभावकारी हुने अपेक्षा मन्त्रालयले गरेको छ ।

नेपालीले लगानी गर्न नसक्ने क्षेत्रमा मात्रै विदेशी लगानी भित्र्याउनुपर्ने उनको भनाइ छ।काठमाडौँ — नेपाल उद्योग वाणिज्य महासंघ (एफएनसीसीआई) का वरिष्ठ उपाध्यक्ष अन्जन श्रेष्ठले ‘जेनजी’ प्रदर्शनपछि निजी क्षेत्रले आफ्नो ‘आत्मविश्वास’ गुमाएको बताएका छन्। समृद्धि फाउन्डेसनको ‘एकसाथ निर्माण: निजी क्षेत्रले नेपालको अर्को अध्यायलाई कसरी हेर्छ?’ भन्ने संवाद–समृद्धि शृङ्खलामा उनले यस्तो बताएका हुन्। ‘विभिन्न आन्दोलनका क्रममा निजी क्षेत्रलाई असर पर्थ्यो, क्षति हुन्थ्यो, तर त्यो त्यही ठाउँमा सीमित हुन्थ्यो,’ श्रेष्ठले भने, ‘तर जेनजी प्रदर्शनका क्रममा व्यक्तिको घर–घरमै पुगेर तोडफोड गरियो।’ सबैभन्दा सुरक्षित मानिने घरमै आक्रमण भएपछि निजी क्षेत्रको आत्मविश्वास गुमेको उनले बताए। ‘जेनजी प्रदर्शन दुई दिन भयो, तेस्रो–चौथो दिन केही नभएजस्तो देखिनु निजी क्षेत्रकै कारण हो,’ उनले भने, ‘जेनजी प्रदर्शनका क्रममा क्षति हुँदा पनि भाटभटेनीका मीनबहादुर गुरूङले “खरानीबाट उठ्छु” भन्नुभएको छ। यसबाट भाग्ने ठाउँ छैन, यहीँबाट अघि बढ्नुपर्छ भन्ने उहाँको धारणा छ।’ प्रदर्शनका क्रममा सरकारी संरचनामा बढी क्षति पुगे पनि सरकारी प्रणाली चलायमान हुन समय लागेको उनले उल्लेख गरे। तर निजी क्षेत्र भने दुई–तीन दिनमै उठेर सफासुग्घर गरी अघि बढिसकेको उनले बताए । निजी क्षेत्रलाई हेर्ने, बुझ्ने र मूल्यांकन गर्ने दृष्टिकोण नै परिवर्तन गर्नुपर्ने उनको जोड थियो।

भारतीय दूतावासले शुक्रबार काठमाडौँमा गरेको एआईसम्बन्धी कार्यक्रममा अधिकारीहरूले डिजिटल सार्वजनिक पूर्वाधार (डीपीआई) र आर्टिफिसियल इन्टेलिजेन्स (एआई) जस्ता क्षेत्रमा सहकार्य बढाउने प्रतिबद्धता पनि व्यक्त गरे ।  काठमाडौँ — नेपाल र भारतका उच्च अधिकारीहरूले दुई देशबीच रहेको ऐतिहासिक, सांस्कृतिक र जनता–जनताबीचको सम्बन्ध विस्तार गर्दै अब डिजिटल डोमेनमा पनि सहकार्य अघि बढाउनुपर्नेमा जोड दिएका छन् । काठमाडौंमा शुक्रबार भारतीय दूतावासले आयोजना गरेको एआईसम्बन्धी कार्यक्रममा अधिकारीहरूले डिजिटल सार्वजनिक पूर्वाधार (डीपीआई) र आर्टिफिसियल इन्टेलिजेन्स (एआई) जस्ता क्षेत्रमा सहकार्य बढाउने प्रतिबद्धता पनि व्यक्त गरे ।  भारत र नेपालको समाज, संस्कृति, परम्परा र बलियो सम्बन्धका कारण डिजिटल डोमेनमा सहकार्य गर्नु अत्यन्त स्वाभाविक हुने नेपालका लागि भारतीय राजदूत नवीन श्रीवास्तवको धारणा छ । डिजिटल सहयोगको बृहत्तर डोमेनमा सरकार र संस्थाहरूलाई सहकार्य गर्न अनुमति दिने गरी सरकारीस्तरमा एउटा समझदारीपत्र (एमओयू) गर्न सकिने उनको भनाइ छ । ‘भारतमा सफल भएका एआई मोडलहरू विकासोन्मुख देश र विशेष गरी नेपालमा प्रयोग गर्न सकिन्छ र भारतले ‘छिमेक पहिलो’ नीतिअन्तर्गत नेपालसँग काम गर्न खोजिरहेको छ,’ उनले भने, ‘भारतले पछिल्लो तीन वर्षदेखि नेपाल र भारतबीच सहकार्यका लागि प्लाटफर्म सिर्जना गर्ने प्रयास गरिरहेको छ ।’ भारतको युनिफाइड पेमेन्ट इन्टरफेस (यूपीआई) नेपालमा उपलब्ध गराएपछि भारतीय पर्यटकको संख्या बढेको उनको दाबी छ ।

फ्लाइओभरमा ६७ वटा त पिलर मात्र रहनेछन् । माथिबाट सवारीसाधन गुड्नेछन् भने त्यसको तलबाट वन्यजन्तु ओहोरदोहोर गर्नेछन् । काठमाडौँ — पूर्व–पश्चिम राजमार्गअन्तर्गत नारायणगढ–हेटौंडा सडकखण्डमा फागुन दोस्रो साताभित्र स्तरोन्नतिका लागि ठेक्का आह्वान गरिने भएको छ । एसियाली विकास बैंक (एडीबी) को सहुलयितपूर्ण ऋणमा मुख्य सडक ४ लेन र बजार क्षेत्रमा सर्भिसलेनसहित ८ लेन सडक बनाइनेछ । नारायणगढबाट हेटौंडासम्म ७० किलोमिटर सडकखण्डको स्तरोन्नति गर्न लागिएको हो । डिजाइनको काम सकिसकेको आयोजना निर्देशनालय (एडीबी) का आयोजना निर्देशक चूडाराज ढकालले बताए । ‘वातावरणीय प्रभाव मूल्यांकन (ईआईए) को काम अन्तिम चरणमा छ,’ उनले भने, ‘निर्माणका लागि तयार पारिएको डिजाइन पनि स्वीकृत हुने चरणमा छ ।’ उनका अनुसार यही राजमार्गमा पर्ने चितवनको टिकौली जंगलमा भने दुई किमि लामो आकर्षक फ्लाइओभर निर्माण गरिँदै छ । ‘यति लामो फ्लाइओभर पहिलोपटक निकुञ्जभित्र निर्माण गर्न लागिएको हो,’ उनले भने, ‘जसले पर्यटकलाई समेत आकर्षित गर्नेछ ।’ उनका अनुसार यसको निर्माणका लागि करिब ७ अर्ब रुपैयाँ लाग्ने अनुमान छ ।

कमाण्डका संयोजक तोकिएका पुष्पराज श्रेष्ठविरुद्ध २०६५ देखि २०७५ सम्म ७ मुद्दा दर्ता भएको प्रहरी अभिलेख रहेको छ। काठमाडौँ — एमालेको ‘नेसनल भोलिन्टियर फोर्स’ का केन्द्रीय कमान्ड प्रमुख पुष्पराज श्रेष्ठ फौजदारी मुद्दाका पटके अभियुक्त भएको खुलेको छ । प्रहरीको ‘क्रिमिनल रेकर्ड सिस्टम’ (सीआरएस) अनुसार उनीविरुद्ध २०६५ देखि २०७५ सम्म ७ वटा मुद्दा दर्ता भएका छन् ।  पछिल्लो पटक भदौ २०७५ मा उनी अपहरण तथा शरीर बन्धकमा संलग्न भएको आरोपमा पक्राउ परेका थिए । ओखलढुंगाको सिद्धिचरण–४ घर भई काठमाडौंको धुम्बाराही बस्दै आएका रामबहादुर कटुवालले आफूलाई धम्की दिएको भन्दै उजुरी दिएपछि प्रहरीले पक्राउ गरेको थियो । उनीमाथि ४ पुस २०७३ मा गणेशकुमार कुँवरलाई बन्धक बनाएर रकम लुटपाट गरेको अभियोगमा समेत अनुसन्धान भएको थियो । कुँवरलाई डेरामा लगेर जबर्जस्ती ११ लाख रुपैयाँ बराबरको चेकसमेत काट्न लगाएको पाइएको थियो । त्यसबेला उनी माओवादीनिकट योङ कम्युनिस्ट लिग (वाईसीएल) को सिन्धुली जिल्ला अध्यक्ष थिए । माओवादी र एमाले मिलेर नेकपा बनेयता उनी एमालेमै रहे ।