भैरहवा ।
माछापुच्छ्रे क्लबको आयोजनामा सञ्चालित ३१औं माछापुछ्रे कप २०८३ अन्तर्गत जेठ ८ गते सम्पन्न भएको रोमाञ्चक फुटबल खेलमा योङ्ग ब्वाइज एफ.सी. विजयी बनेको छ । सिद्धार्थनगर नगरपालिका–२ स्थित पक्लिहवा कृषि क्याम्पसको खेलमैदानमा सम्पन्न खेलमा योङ्ग ब्वाइज एफ.सी.ले लिस्नु एफ.सी.लाई १–० गोल अन्तरले पराजित गरेको हो ।
खेलको सुरुवातदेखि नै दुवै टोलीले आक्रामक र आकर्षक प्रदर्शन गरेका थिए । दर्शकको उत्साहजनक उपस्थितिबीच भएको खेलको पहिलो हाफको १२औं मिनेटमा योङ्ग ब्वाइज एफ.सी.का जर्सी नं. ३७ का खेलाडी बिन्देले उत्कृष्ट गोल गर्दै टोलीलाई अग्रता दिलाएका थिए । उनले गरेको उक्त गोल नै खेलको निर्णायक गोल बन्न पुग्यो ।
गोल खाएपछि लिस्नु एफ.सी.ले खेलमा फर्किन लगातार प्रयास गरेको थियो । टोलीले केही अवसर सिर्जना गरे पनि त्यसलाई गोलमा परिणत गर्न नसक्दा बराबरी गर्न असफल रह्यो । उता, योङ्ग ब्वाइज एफ.सी.ले सुदृढ रक्षापंक्ति तथा संयमित खेल प्रदर्शन गर्दै आफ्नो अग्रता जोगाउन सफल भयो ।
खेलभर दुवै टोलीबीच कडा प्रतिस्पर्धा देखिए पनि अन्ततः बिन्देको एकमात्र गोलले योङ्ग ब्वाइज एफ.सी.लाई महत्वपूर्ण जित दिलायो । जितसँगै टोलीले प्रतियोगितामा थप आत्मविश्वासका साथ आफ्नो यात्रा अघि बढाएको छ ।
यस खेलको दैनिक उत्कृष्ट खेलाडी पुरस्कार नगद १ हजार ५ सय ५ रुपैयाँ योङ्ग ब्वाइज एफ.सी.का जर्सी नं. ३७ का खेलाडी बिन्देलाई प्रदान गरिएको आयोजकले जनाएको छ ।
प्रतियोगिताअन्तर्गत जेठ ९ गते सम्पूर्ण एफ.सी. सुपौली र भैरव एफ.सी. नवलपरासीबीच प्रतिस्पर्धा हुने आयोजकले जानकारी दिएको छ । आगामी खेलहरू अझ रोमाञ्चक र प्रतिस्पर्धात्मक हुने अपेक्षा गरिएको छ ।
